Wicomb Reunion 2007 - Garnett Wicomb

WICOMB FAMILIE 2007 SAAMTREK

Calitzdorp Spa 27 -29 April 2007

Oorsig en dankiesê

Hallo Familie,

Ons het lank daarna uitgesien en beplan en dit het so vinnig verby gevlieg. Maar wat ‘n suksesvolle saamtrek was dit nie.
Hierdie is net ‘n kort oorsig en om dankie te sê aan almal wat gekom en bygedra het tot die groot sukses darvan.
Soos almal wat daar was sekerlik weet was ons teen Sondag meer as 300 bymekaar. Lekkerrrr…
Die saamtrek het op Donderdag 26 April reeds nie-amptelik begin met Aubrey van Kaapstad wat vroegmiddag reeds aangeland het.
Ek was die tweede wat geland het gevolg deur Peter en Judy Snyman, Jonathan en sy gesin, Johan Wicomb, Colin Swigelaar en Granville Josephs.
Hoewel dit die aand lekker koud was, en later lekker gereën het - die seën op die samekoms - het dit niemand afgesit nie. Die vure is aangesteek en die eerste tjoppies is gebraai.
Vrydagoggend het hulle teen ‘n vinnige tempo ingestroom.
Die amptelike verwelkoming teen 1-uur se kant was ‘n heuglike geleentheid. Meester Simon het die naweek met ‘n kragtige gebed geopen en die seën van die Here gevra. Hierna het die voorsitter van die Oudtshoorn reëlingskomitee, Jonathan, die verwelkoming gedoen terwyl Aubrey en Farouk dit namens die Wes- en Oos-Kapenaars gedoen het.
Die weer was maar triestig met die gevolg dat die middag se buite-aktiwiteite wat beplan was nie kon plaasvind nie.
Daar is egter behoorlik gekuier terwyl die Oos-Kapenaars hard besig was om die aandete voor te berei.
En watter lekker gereg was dit nie.
Hierna het ‘n gesellige aand gevolg met die twee grapmakers van die Oos-Kaap, Donovan en Gerard, wat hulle goed van hul taak gekwyt het.
Hierna is die tafels en stoele eenkant toe geskuif en is daar behoorlik deur oud en jonk ge”bart”..
Die jongmense het natuurlik tot vroegoggend gekuier.
Die weer het Saterdag verbeter en teen 1uur se kant was die kleuters aan die gang met die skattejag (Dankie Phillip) terwyl daar ook lekker krieket gespeel is.
En toe verskuif die aksie na die gras waar ons lekker tou getrek het, alhoewel alles nie fair and square was nie.. Ook die eier-en-lepel resies was ‘n wenner.
Die aand se snoekbraai wat die Kapenaars vir ons aangebied het was uit die boeke. Daai tafels met die seesand, skulpies, die tuisgebakte brood, die patat. Wie kan dit vergeet?.
En toe die aand se verrigtinge. Dankie aan Maureen vir die koördinering net jammer die ouer garde wou nie saamspeel nie.
Die vertoning van klein Rees Bergstedt was voortreflik en in die toekoms sal ons meer hiervan wil sien.
Ons jong modelle was pragtig. En wie sal die dansvertoning van Gerard en Mabré vergeet!. Julle was puik.
Sondag se dankseggingsdiens was ongetwyfeld die hoogtepunt van die naweek met Uncle Amp wat ‘n pragtige boodskap gebring het. Dankie aan Liesle wat op kort kennisgewing voor getrek en al die ander wat deel uitgemaak het van die program.
Uncle Amp se boodskap uit Romeine 12: 1-13 was een van liefde, nederigheid en weldadighied.
Die aansteek van ‘n kers ter nagedagtenis aan familie wat sedert die laaste saamtrek oorlede is was ‘n hartroerende geleentheid.
Die Oudtshoorn familie het vir die Sondagmiddagete gesorg en soos gewoonlik is asem opgehou dat elkeen iets te eet kon kry. En ‘n paar het nie gekry nie, jammer daarvoor.

En toe kom groettyd, so gou.
Ebrahim het namens die Oos-Kaapse familie, Aubrey namens die Wes-Kapenaars en die voorsitter namens die tuisspan die bedankings gedoen. Die Wicomb Song is weer lekker gesing en so ook die tellery van 21 tot ‘n 100.
Die algemene gevoel is dat die volgende saamtrek in 2010 gehou moet word, saam met die Wêreld Sokkerbeker eindstryd. Maar dit sal waardeer word indien die familie insette hieroor lewer en of dit miskien vroeër moet plaasvind. Drie jaar is lank.
Laat weet die sekretaris by sport@hoorn.co.za; Faks (044) 272 5604: Selfoon: 072 4686 456.
En oja, lees verder oor die Wicomb Familie op die Internet: http://wicomb.blogspot.com/

Groetnis tot ‘n volgende keer.

………………………….
Sekretaris

NB: Lees verder oor ons familie op die Internet: http://wicomb.blogspot.com/